Ала-Арча суу сактагычында ижарачыга таштанды үчүн 17 миң сом айып салынды
Экология жана техникалык көзөмөл кызматынын Бишкек шаары жана Аламүдүн району боюнча башкармалыгы социалдык тармактарда жарыяланган видео жана маалыматтардын негизинде Ала-Арча суу сактагычынын аймагында ыкчам текшерүү жүргүздү.
Жаратылыш ресурстары министрлигинин басма сөз кызматы билдиргендей, текшерүүдө суу сактагычтын аймагы өз убагында таштандыдан тазаланбай, санитардык жана экологиялык талаптар одоно бузулганы аныкталды.
Аталган мыйзам бузуулар боюнча протокол түзүлүп, ижарачыга 17 миң сом өлчөмүндө айып салынды.
Мындан тышкары, тескөөчүлөр ижарачыга экологиялык талаптарды так сактоо, аймакты үзгүлтүксүз тазалап, санитардык абалды талаптагыдай камсыз кылуу боюнча тиешелүү эскертүүлөрдү беришти.
Жаратылыш ресурстары, экология жана техникалык көзөмөл министрлиги айлана-чөйрөнү коргоого кайдыгер карабай, көйгөйлөр тууралуу маалымат берип жаткан коомчулукка ыраазычылык билдирди.
