Баткендеги ооруканада өрт коопсуздугу боюнча кемчиликтер кайра аныкталды
Баткен облустук биргелешкен ооруканасында өрт коопсуздугу боюнча текшерүү жүргүзүлүп, буга чейин аныкталган айрым кемчиликтер толук жоюлбаганы белгилүү болду. Бул тууралуу ӨКМдин аймактагы башкармалыгынан билдиришти.
Текшерүүдө өрт сигнализациясынын талаптагыдай иштебегени, чатырдын жыгачтарына өрткө каршы каражат колдонулбаганы, суу көлмөсүндө жана электр тармактарында өрт коопсуздугунун талаптары сакталбаганы аныкталды.
Натыйжада белгиленген мөөнөттө кемчиликтер жоюлбаганы үчүн ооруканага 23 миң сом өлчөмүндө айып пул салынды.
Тиешелүү кызматтар мекемеге аныкталган мыйзам бузууларды толук жоюп, имараттарды өрт коопсуздугунун талаптарына ылайык келтирүү боюнча ыкчам чараларды көрүүнү талап кылды.
