Кадамжай жана Ноокатта мектеп, бала бакча жана тез жардам көйгөйү көтөрүлдү
Кадамжай жана Ноокат райондорунда жергиликтүү тургундар менен жолугушууларда бир катар социалдык маселелер көтөрүлдү. Бул тууралуу Жогорку Кеңештин басма сөз кызматы билдирди.
Маалыматка ылайык, депутат Жаныбек Аматов 19-августта аймакта болуп, калк менен орчундуу көйгөйлөрдү талкуулады.
Алсак, Кадамжай районунун Масалиев айыл өкмөтүндөгү Полман айылынын тургундары жпсихоневрологиялык ооруканада тез жардам унаасынын жоктугу көйгөй жаратып жатканын айтышып, мамлекеттик органдарга кайрылуу зарылдыгын билдиришти.
Лесхоз жана Таш-Коргон айылдарында бала бакчанын жоктугу жана жетишсиздиги негизги көйгөйлөр экени белгиленди. Ал эми Олагыш-Алыш айылдарында спорт комплексин куруу маселеси талкууланды.
Ноокат районунун Кулуштан-Казы айылындагы курулушу 2022-жылы башталып, бир кабаты бүткөндөн кийин токтоп калган мектептин маселеси көтөрүлдү.
Ошондой эле Апшыр-Ата айылында 250 окуучуга ылайыкташтырылып салынып жаткан билим берүү мекемесинин абалы көзөмөлдөндү.
Жолугушууларда көтөрүлгөн маселелерди чечүү, социалдык объектилердин курулушун улантуу жана калктын муктаждыктарын эске алуу боюнча тиешелүү иштер жүргүзүлөрү белгиленди.
