Кара-Суу районунда чек арадан мыйзамсыз өткөн чет өлкөлүктөр кармалды
Ош облусунда мамлекеттик чек арадан мыйзамсыз өткөн 3 чет өлкөлүк жаран кармалды. Бул тууралуу Ош облустук ички иштер башкармалыгынын басма сөз кызматы билдирди.
Маалыматка ылайык, Ош ОИИБ менен Кара-Суу РИИБдин кызматкерлерине чет өлкөлүк жарандар Кыргызстандын аймагына мыйзамсыз өтүп, Кара-Суу районундагы айылдардын биринде жашырынып жүргөнү тууралуу ыкчам маалымат түшкөн.
Жүргүзүлгөн ыкчам-издөө иш-чараларынын натыйжасында коңшу өлкөлөрдүн биринин 2000-жылы туулган Ш.Б. аттуу жараны кармалып, соттун чечими менен камакка алынган.
Текшерүүнүн жүрүшүндө мамлекеттик чек арадан мыйзамсыз өтүү фактысы боюнча дагы эки кылмыш иши козголуп, эки чет өлкөлүк жаран кармалган.
Мындан тышкары, чет өлкөлүк жарандарды мамлекеттик чек арадан мыйзамсыз алып өтүүнү уюштурган адам аныкталып, ага карата мыйзамсыз миграцияны уюштуруу беренеси боюнча кылмыш иши козголду.
Учурда кармалгандардын башка кылмыштарга тиешеси бар-жогун аныктоо боюнча тергөө иштери жүргүзүлүүдө.
