Карызы бар жүк ташуучу унаалар Орусиядагы акы төлөнүүчү жолдордон өтө албайт
Мамлекеттик бажы кызматы эл аралык ташууларды жүргүзгөн ата мекендик ташуучуларга Орусиянын акы төлөнүүчү унаа жолдорунун жаңы талаптары тууралуу эскертти.
Маалыматка ылайык, 1-сентябрдан тартып Орусиянын бажы органдары транспорт каражатынын мамлекеттик каттоо номери боюнча төлөм жүргүзгөнүн маалыматтык тутумдар аркылуу текшерет.
Эгер төлөнбөгөн карыз аныкталса, система транспорт каражатынын мындан ары жүрүүсүнө тыюу салуу чечимин автоматтык түрдө түзөт. Жүк ташуучу унаанын жүрүүсүнө карыз толугу менен төлөнгөндөн кийин гана уруксат берилет.
Мамлекеттик бажы кызматы кыргызстандык ташуучуларга Орусиянын акы төлөнүүчү жолдорунан өтүү үчүн карыздын бар-жогун азыртан текшерүүнү сунуштады.
Белгиленгендей, бул талаптарды эске алуу эл аралык ташуулардын кечигүүсүн алдын алууга жардам берет.
