Миң-Булактын тургундары полигондогу түтүн боюнча бир нече ирет кайрылышкан
19-августта Чүй облусунун Миң-Булак айылындагы таштанды талаасынан чыгып жаткан түтүн жана жагымсыз жыт маселеси талкууланды. Бул тууралуу Жогорку Кеңештин басма сөз кызматы билдирди.
Маалыматка ылайык, бүгүн депутат Карим Ханжеза жаратылыш ресурстары, экология жана техникалык көзөмөл министринин орун басары Асел Раимкулова менен таштанды талаасына келип, жооптуу жетекчилер менен маселени чечүү жолдорун карашты.
Белгиленгендей, буга чейин жергиликтүү тургундар таштанды талаасындагы өрттөн улам айылды түтүн каптап, жагымсыз жыт тараганына тынчсызданып, эл өкүлү Карим Ханжезага бир нече жолу кайрылышкан.
Жолугушуунун жыйынтыгында калктын экологиялык коопсуздугун камсыз кылуу боюнча узак мөөнөттүү чечимдерди иштеп чыгуу зарылдыгы белгиленди.
