Орусияда ата-энесинин камкордугусуз калган үч бир тууган Кыргызстанга келди
Ички иштер министри Улан Ниязбековдун тапшырмасы менен Орусиядан ата-энесинин камкордугусуз калган үч бир тууган Кыргызстанга кайтарылды. Бул тууралуу ИИМдин басма сөз кызматы билдирди.
Буга чейин социалдык тармактарда Москва шаарында Кыргызстандын жараны жашы жете элек баласын ооруканага жаткырып, кийин полиция кызматкерлери тарабынан кармалып, өлкөдөн чыгарылганы жана анын өспүрүм баласы кароосуз калганы тууралуу маалымат тараган.
Аталган маалыматтын негизинде ИИМдин Коомдук коопсуздук кызматынын Жашы жете электер арасындагы укук бузуулардын алдын алуу боюнча борборунун кызматкерлери тиешелүү тактоо иштерин жүргүзгөн.
Текшерүүнүн жүрүшүндө жашы жете элек бала өзүнүн бир тууган агасы жана эжеси менен бирге 3-июлда Москва шаарындагы балдар реабилитациялык борборуна ата-энесинин камкордугусуз калган балдар катары жайгаштырылганы аныкталган.
Балдардын укуктарын жана мыйзамдуу кызыкчылыктарын коргоо максатында ИИМ тиешелүү иштерди жүргүзүп, үч бир тууган Орусиядан Кыргызстанга келди. Учурда балдар атасынын жанында.
