Араван жана Ноокатта мектептин имараттары бала бакча катары пайдаланылууда
Араван жана Ноокатта бала бакча, мектеп жана маданият үйүнө байланыштуу маселелер көтөрүлдү. Бул тууралуу Жогорку Кеңештин басма сөз кызматы билдирди.
Маалыматка ылайык, депутат Жаныбек Аматов калк менен жолугушуу үчүн аймакка барган.
Тургундардын айтымында, Араван районунун Авиз айылында бала бакчада орун жетишсиз болуп, мектептин үч классы бала бакча катары пайдаланылып жатат. Ал эми Ноокат районунун Жайылма айылында мектеп имаратынын бир бөлүгү бала бакчага берилген.
Ошондой эле Тоо-Моюн айылында тургундар Авиз айылындагы "Солнышко" бала бакчасы союз тарагандан бери иштебей турганын билдиришти. Орун жетишсиз болгондуктан, айрым балдар башка айылдардагы бала бакчаларга барууга аргасыз.
Мындан тышкары, Авиз айылындагы маданият үйүнүн тиешелүү документтери жоктугунан калыбына келтирүү иштерин жүргүзүүгө мүмкүн болбой жатканы айтылды.
Эл өкүлү көйгөйлөрдү тиешелүү мамлекеттик жана жергиликтүү бийлик органдарына жеткирүү жана чечүүгө көмөктөшүү боюнча иштер жүргүзүлөрүн белгиледи.
