Чоң-Гара жана Таш-Дөбөнүн 1354 тургуну кыргыз жарандыгын алууга документ тапшырды
Баткен облусунун башчысы Мамыржан Рахимов Өзбекстандан Кыргызстанга өткөн Чоң-Гара жана Таш-Дөбө айылдарынын тургундары менен жолугушту. Анда жарандык алуу жана тиешелүү документтерди даярдоо маселелери талкууланды.
Аймактык өкүлчүлүктүн басма сөз кызматынын маалыматына ылайык, жолугушууда тургундардын суроо-талаптары эске алынып, кыргыз жарандыгын алуу үчүн документтерди кабыл алуу мөөнөтү дагы бир жумага узартылды.
Учурда Чоң-Гара айылында 1 492 тургун жашайт. Алардын 139у Кыргызстандын жараны. Бүгүнкү күнгө чейин 1 147 адамдын кыргыз жарандыгын алуу боюнча документтери кабыл алынган.
Таш-Дөбө айылында 466 тургун бар. Анын 116сы Кыргызстандын жараны. Кыргыз жарандыгын алуу үчүн 207 адамдын документтери кабыл алынган.
Мындан тышкары, тургундар социалдык маселелерди, анын ичинде тиешелүү кызматтар менен камсыздоо жана күнүмдүк көйгөйлөрдү көтөрүштү.
Облус башчысы жооптуу кызматтарга жарандарга документ берүү иштерин сапаттуу жүргүзүү жана көтөрүлгөн маселелерди мыйзам чегинде мүмкүн болушунча тез чечүү боюнча тапшырмаларды берди.
