Бийик тоолуу аймактардагы 30 миңге жакын бала ай сайын 3 миң сомдон алууда
Кыргызстанда бийик тоолуу, алыскы жана айрым чек арага жакын аймактарда жашаган үй-бүлөлөрдүн үчүнчү жана андан кийинки балдарына берилүүчү ай сайынкы жөлөк пулду 29,6 миң бала алып жатат.
Эмгек, социалдык камсыздоо жана миграция министрлигинен билдиришкендей, жаңы жөлөк пул 2026-жылдын январь айынан тартып киргизилген. Анын өлчөмү айына 3 миң сомду түзөт.
Төлөм бала төрөлгөндөн тартып үч жашка толгонго чейин берилет. Жөлөкпулду дайындоодо үй-бүлөнүн материалдык абалы эске алынбайт.
Белгилей кетсек, Кыргызстандын бийик тоолуу аймактарынын тизмесинде 430 айыл жана башка калктуу конуштар бар.
