Эмгек укуктарын коргоо көрсөткүчүнүн төмөндөө себептери такталат
Кыргызстандын эмгек, социалдык камсыздоо жана миграция министри Канат Сагынбаев министрликтин 2026-жылдын биринчи жарым жылдыгынын жыйынтыгы боюнча коллегиясында бир катар тапшырмаларды берди.
Министрликтин басма сөз кызматы билдиргендей, жыйында жарандардын эмгек укуктарын коргоо жаатындагы көрсөткүчтөрдүн төмөндөшү талкууланды.
Маалыматка ылайык, 2026-жылдын биринчи жарым жылдыгында өндүрүштөгү кырсыктан же жаракаттан келтирилген зыян үчүн төлөнгөн кенемтелердин көлөмү 11,4 млн сомду түзгөн. Бул өткөн жылдын ушул мезгилиндеги 58,8 млн сомго салыштырмалуу кыйла аз.
Ошондой эле жарандарга кайтарылган эмгек акы боюнча карыздын көлөмү 7,2 млн сомдон 4,4 млн сомго төмөндөгөн.
Министр бул көрсөткүчтөрдүн төмөндөшүнүн себептерин талдап, тиешелүү чараларды көрүүнү жооптуу түзүмдөргө тапшырды.
Мындан тышкары, ченемдик-укуктук базаны өркүндөтүү боюнча ишти күчөтүү жана министрлик тарабынан даярдалган актылардын долбоорлорунун сапатын жогорулатуу милдети коюлду.
