Кыргызстанда каттоодо турган жумушсуздардын саны 7%га азайды
2026-жылдын 1-июлуна карата Кыргызстандын иш менен камсыз кылуу кызматтарында 60,5 миң жумушсуз жаран каттоодо турган. Бул тууралуу Эмгек, социалдык камсыздоо жана миграция министрлигинин басма сөз кызматы билдирди.
Маалыматка ылайык, бүгүнкү коллегияда министрдин биринчи орун басары Камчыбек Досматов бул көрсөткүч өткөн жылдын ушул мезгилине салыштырмалуу 7%га аз экенин билдирди.
Белгиленгендей, каттоодо тургандардын ичинен 37,8 миң адам расмий жумушсуз статусуна ээ. Бул көрсөткүч былтыркы жылдын ушул мезгилине салыштырмалуу 17%га төмөн.
2025-жылдын 1-июлуна карата иш менен камсыз кылуу кызматтарында 65,4 миң жумушсуз жаран каттоодо турган. Алардын 45,5 миңи расмий жумушсуз статусуна ээ болгон.
Учурда өлкөдө расмий жумушсуздуктун деңгээли экономикалык активдүү калктын 1,3%ын түзөт.
2026-жылдын биринчи жарым жылдыгында иш менен камсыз кылуу кызматтары 7,1 миң адам жумушка орноштуруп, 13,1 миң жаран иш менен камсыз кылууга багытталган чараларга тартылган.
