Жыл башынан бери 989 миңден ашык адамга социалдык кызмат көрсөтүлдү
2026-жылдын биринчи жарым жылдыгында 989,5 миң адамга Эмгек, социалдык камсыздоо жана миграция министрлигинин кызматтары көрсөтүлдү. Бул өлкө калкынын болжол менен 14%ын түзөт.
Министрликтин басма сөз кызматы билдиргендей, коллегиялык отурумда эмгек, социалдык камсыздоо жана миграция министринин биринчи орун басары Камчыбек Досматов ишмердүүлүк боюнча маалымат берди.
Ага ылайык, 410,6 миң адамга жөлөкпул жана кенемте түрүндө социалдык төлөмдөр берилген.
Ошондой эле 112,2 миң жаранга иш менен камсыз кылууга көмөктөшүү, эмгек жана эмгек мамилелери чөйрөсүндөгү кызматтар көрсөтүлгөн.
Мындан тышкары, майыптыгы бар адамдарды, улгайган жарандарды, оор турмуштук кырдаалга кабылган үй-бүлөлөрдү жана балдарды камтыган 361,7 миңге жакын адамга жардам беришкен.
Аларга протездик-ортопедиялык буюмдар, керектүү жабдуулар менен камсыздоо, санатордук-курорттук жолдомолорду берүү, үй шартында кам көрүү жана башка жардамдар кирет.
Миграция чөйрөсүндө 105 миңге жакын адам тиешелүү кызматтар менен камсыз болгон.
Камчыбек Досматовдун айтымында, мамлекет тарабынан кепилденген социалдык милдеттенмелер толук көлөмдө аткарылууда.
