Бишкектеги эки мектеп жаңыланып, заманбап спорт аянтчалары курулууда
Бишкек шаарынын мэри Айбек Жунушалиев №58 жана №112 мектептерде жүргүзүлүп жаткан курулуш жана оңдоо иштеринин жүрүшү менен жеринен таанышты.
Мэриянын маалыматына ылайык, №58 мектептин аймагында кичи футбол жана баскетбол аянтчалары, воркаут жана балдар аянтчалары курулууда. Ошондой эле тышкы жарыктандыруу орнотулуп, чуркоо жолдору, пандустар жана отургучтар коюлат. Мындан тышкары, тротуарлар менен жолдор оңдолуп, аймак жашылдандырылып, сугаруу системасы орнотулат.
Ал эми №112 мектепте капиталдык оңдоонун алкагында имарат толугу менен жаңыланып, инженердик тармактар, терезелер, эшиктер жана ички жасалгалар алмаштырылууда. Мектептин аймагында спорттук жана балдар аянтчалары, чуркоо жолдору, тышкы жарыктандыруу жана эс алуу жайлары да курулат.
Учурда №112 мектепте демонтаждоо жана электр-монтаждоо иштери толугу менен аяктап, шыбактоо, фасадды оңдоо жана башка курулуш иштери жүрүп жатат.
Объектилерди кыдыруунун жыйынтыгында шаар мэри Капиталдык курулуш башкармалыгына эки мектептеги иштерди өзгөчө көзөмөлгө алып, курулуштун сапатын жана аткаруу темпин күчөтүүнү тапшырды.
Ошондой эле билим берүү мекемелеринин аймактарын жашылдандырууга, жашыл өсүмдүктөрдүн санын көбөйтүүгө жана аларды үзгүлтүксүз сугарууну камсыз кылууга өзгөчө көңүл буруу милдети коюлду.
