Өзгөндө видеону өчүрүү үчүн акча талап кылган жаран кармалды
Өзгөн районунда жаранды видеого тартып алып, аны өчүрүү үчүн акча талап кылууга шектелген адам кармалды. Бул тууралуу Ош облустук ички иштер башкармалыгынын басма сөз кызматы билдирди.
Маалыматка ылайык, 20-августта Өзгөн райондук ички иштер бөлүмүнө 2008-жылы туулган И.З. аттуу жаран Н.Х. аттуу адамды автоунаада аял киши менен отурган жеринен видеого тартып алып, опузалаганы тууралуу маалымат түшкөн.
Аталган факты боюнча Кылмыш-жаза кодексинин 208-беренеси менен кылмыш иши козголду. Тергөөнүн жүрүшүндө И.З. видеону өчүрүү үчүн Н.Х.дан 20 миң сом талап кылганы аныкталды.
Өзгөн РИИБдин кызматкерлери 22-августта шектүү талап кылган акчанын 15 миң сомун алып жаткан жеринен кармаган. Ал убактылуу кармоочу жайга киргизилди.
Милициянын маалыматына караганда, шектүү буга чейин кылмыш жасап, сот жообуна тартылган жана учурда пробациялык көзөмөлдө болгон.
Учурда тергөө иштери улантылууда.
