Терек-Ташта жергиликтүү бийлик жеке менчик жердеги таштандыларды тазалады
Чүй районунун Онбир-Жылга айыл аймагына караштуу Терек-Таш капчыгайында топтолгон мыйзамсыз таштандылар толугу менен тазаланды. Бул тууралуу аймактын мамлекеттик админстрациясынан билдиришти.
Буга чейин социалдык тармактарда аталган аймакта таштанды топтолуп калганы тууралуу маалымат тараган. Терек-Таш капчыгайындагы таштанды ташталган жер тилкесинин жалпы аянты 2 гектарды түзүп, жеке менчикке таандык экени белгиленди.
Ошого карабастан, Онбир-Жылга айыл өкмөтү аймактын санитардык абалын жакшыртуу боюнча тиешелүү иштерди жүргүздү.
23-августта айыл өкмөтүнө караштуу муниципалдык ишкананын кызматкерлери атайын техниканын жардамы менен жерине барып, аймактагы башаламан таштандыларды толугу менен тазалашты.
Айыл өкмөтү жарандарды таштандыларды белгиленбеген жерлерге таштабоого, айлана-чөйрөнүн тазалыгын сактоого жана жаратылышка аяр мамиле кылууга чакырды.
