Жайыл районунда коомдук ынтымакты бекемдөө маселеси талкууланды
24-августта Жайыл районунда улуттар аралык, этностор аралык жана конфессиялар аралык ынтымакты чыңдоо боюнча жыйын өттү. Бул тууралуу Чүй облусунун ички иштер башкармалыгынын басма сөз кызматы билдирди.
Маалыматка ылайык, иш-чара район акими Имамназар Буркановдун демилгеси менен уюштурулуп, ага район акимдигинин өкүлдөрү, Жайыл РИИБдин башчысы М.Калманбетов, этникалык маселелер боюнча адис, "Содружество" диаспоралар коомунун төрагасы Х. Хашимов жана 13 диаспоранын өкүлдөрү катышты.
Жолугушууда коомдук ынтымакты жана биримдикти сактоо, улуттар жана диндер аралык чыр-чатактардын алдын алуу, ошондой эле мамлекеттик органдар менен диаспоралардын кызматташтыгын күчөтүү маселелери талкууланды.
Катышуучулар коомдогу туруктуулукту сактоо, түшүнбөстүктөрдүн алдын алуу жана калк арасында өз ара урмат-сыйды бекемдөө боюнча пикир алышты.
Жыйындын соңунда коомдук ынтымакты сактоо багытында биргелешкен иштерди улантуунун маанилүүлүгү белгиленди.
