Жаштар үчүн такшалма программасы дагы 24 аймакта ишке кирет
Бишкекте жаштарга такшалма уюштуруу жана ишке ашыруу, ошондой эле кесиптик жана жумшак көндүмдөрүн өнүктүрүү боюнча үч күндүк тренинг жыйынтыкталды. Бул тууралуу Эмгек, социалдык камсыздоо жана миграция министрлигинен билдиришти.
Маалыматка ылайык, катышуучулар иш берүүчүлөр менен кызматташуу жана жаштарды эмгек рыногуна даярдоо боюнча колдонмолуу билим алышты.
Министрликтин маалыматына караганда, жаштардын такшалмадан өтүүсү боюнча сыноо иретинде колдонулган программа өлкөнүн 30 шаар жана районунда ишке ашырылып, натыйжалуулугун көрсөткөн.
Такшалма жаштарга алгачкы иш тажрыйбасын топтоп, алган билимдерин иш жүзүндө колдонууга жана кесиптик көндүмдөрүн өнүктүрүүгө шарт түзөт.
Ал эми иш берүүчүлөргө болочок кызматкерлердин жөндөмүн баалоого жана адистерди өздөрүнүн талаптарына ылайык даярдоого мүмкүнчүлүк берет.
Министрдин биринчи орун басары Камчыбек Досматов такшалма жаштар үчүн алгачкы иш тажрыйбасын алуу менен гана чектелбестен, жарандардын, иш берүүчүлөрдүн жана мамлекеттин кызыкчылыктарын айкалыштырган натыйжалуу механизм экенин белгиледи.
Белгиленгендей, учурда такшалма программасын өлкөнүн калган 24 аймагына кеңейтүү пландалууда. Министрлик жаңы иш берүүчүлөрдү тартууга жана кесиптик билим берүү уюмдары менен кызматташууну күчөтүүгө багытталган иштерди улантат.
