Алайда табигый кырсыктардын алдын алуу боюнча ири иштер аткарылууда
Алай районунда сел, жер көчкү жана башка өзгөчө кырдаалдардын алдын алуу боюнча иштер жүргүзүлүүдө. Бул тууралуу аймактын мамлекеттик админстрациясынан билдиришти.
Маалыматка ылайык, Гүлчө шаарына караштуу Чакмак айылында жер көчкү коркунучун жоюу үчүн ӨКМдин атайын долбоору менен курулган дамбанын курулушу 100% аяктады. Сыноо иштеринен кийин бул аймактагы 13 турак үйгө жана 1 мечитке уруксат документтерин берүү каралууда.
Райондо жер көчкү коркунучу бар 5 тилке атайын долбоорго киргизилген. Алар — Чакмак, Кызыл-Ой, Мукур-1, Мукур-2 жана Мурдаш тилкелери.
Белгиленгендей, Кызыл-Ой тилкесинде дамба куруу иштери жүрүп жатат. Мукур-1 жана Мукур-2 тилкелери бир долбоорго бириктирилип, жалпы сметалык баасы 41 млн 240 миң сомду түздү.
Мындан тышкары, райондун айыл аймактарында сел каналдары тазаланып, сел тосмолор жана сел өткөрүүчү каналдар курулуп, дарыя жээктери бекемделүүдө. Миязды айылындагы 330 метрлик сел каналы, Арпа-Тектир айылындагы 800 метрлик сел өткөрүүчү канал тазаланды.
Учурда 1-Май айылындагы Шоро-Булак аймагында 300 метрлик сел өткөрүүчү каналдарды жана Гүлчө шаарындагы Жаңы-Савай аймагындагы сел каналын тазаланып жатат.
Жүргүзүлүп жаткан иштер калкты, турак жайларды, жолдорду жана социалдык жайларды табигый кырсыктардын коркунучунан коргоого багытталганы белгиленди.
