"Бишкек Аренага" алып кирүүгө тыюу салынган буюмдар белгиленди
Дүйнөлүк көчмөндөр оюндарынын ачылыш аземине байланыштуу Ички иштер министрлиги "Бишкек Арена" стадионуна алып кирүүгө тыюу салынган буюмдардын тизмесин жарыялады.
Министрликтин басма сөз кызматы билдиргендей, тыюу салынган буюмдардын катарына тамеки, IQOS, насвай, сагыз, сырттан алып келинген тамак-аш жана суусундуктар, айнек бөтөлкөлөр, банкалар, көлөмдүү баштыктар жана жагдандар кирет.
Ошондой эле стадиондун аймагына курал-жарак, сайгыч-кесүүчү буюмдар, пиротехникалык каражаттар, аэрозолдук жана газ баллондору, дрондор, кесиптик видеокамералар, жогорку жыштыктагы байланыш жабдуулары, музыкалык аспаптар, ышкырыктарды алып кирүүгө жол берилбейт.
ИИМ билдиргендей, тыюу салынган буюмдар кире бериште текшерилет.
Мындан тышкары, жарандардан стадионго өз убагында келип, текшерүү учурунда милиция кызматкерлеринин мыйзамдуу талаптарын аткарууну жана коомдук тартипти сактоону суранышты.
Ошондой эле Дүйнөлүк көчмөндөр оюндары өтүп жаткан күндөрү Бишкек шаарынын, Чүй жана Ысык-Көл облустарынын айрым жол тилкелеринде унаа кыймылына убактылуу чектөөлөр киргизилери эскертилди.
