Чүй районунда 30 жаран акы төлөнүүчү коомдук иштерге катышты
Чүй районуна эмгек, социалдык камсыздоо жана миграция министринин биринчи орун басары Камчыбек Досматов жана БУУ Дүйнөлүк азык-түлүк программасынын Кыргызстандагы кеңсесинин директорунун орун басары Согжин барышты.
Маалыматка ылайык, "Акы төлөнүүчү коомдук иштер" долбоордун кезектеги этабына Онбир-Жылга айыл өкмөтүнүн 30 тургуну катышып, социалдык жана сугат тутумун жакшыртууга багытталган иштерди аткарышкан.
Алар Калыгул Алыш атындагы суткалык жөнгө салуучу бассейнди жана Шамшы айылындагы каналды тазалашты. Селден кийин канал таштарга толуп, суунун талааларга жетүүсү кыйындаган.
Белгиленгендей, узундугу 1,5 чакырым болгон канал Карагул, Чоң-Жар, Кош-Кашат жана Шамшы айылдарындагы болжол менен 600 гектар жерди сугат суу менен камсыз кылат. Бул аймакта 247 кожолук жайгашкан.
Аткарылган коомдук иштер үчүн долбоордун катышуучуларына БУУ азык-түлүк жардамын, ал эми министрлик акчалай колдоо көрсөтөт. Жалпысынан 30 катышуучуга 9 тонна байытылган буудай уну жана 900 литр өсүмдүк майы берилди.
