Чүйдө калдыктар кайра иштетилип, башаламан таштанды төгүүчү жайлар азаят
Чүй облусундагы таштанды төгүлүүчү жайларда топтолгон калдыктарды Бишкектеги кайра иштетүүчү заводго жеткирүү маселеси боюнча жолугушуу өттү. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, жыйынга Чүй облусундагы ыйгарым укуктуу өкүлчүлүктүн аппаратынын, жергиликтүү өз алдынча башкаруу органдарынын, райондук администрациялардын жана айыл өкмөттөрүнүн өкүлдөрү, шаарлардын мэриялары, ошондой эле Бишкектеги заводдун жана санитардык полигондун өкүлдөрү катышты.
Учурда Бишкектеги заводдун өндүрүштүк кубаттуулугу күнүнө 1300–1500 тоннаны түзөт. 2028–2029-жылдарга карата аны суткасына 3000 тоннага чейин жогорулатуу жана калдыктардан электр жарыгын өндүрүү көздөлүүдө.
Жолугушууда алыскы райондордон таштандыларды Бишкектеги заводго жеткирүүнүн экономикалык жактан натыйжалуулугу жана жергиликтүү өз алдынча башкаруу органдарынын төлөө мүмкүнчүлүгү талданды.
Жолугушууда министрлик калдыктарды башкаруу боюнча жаңы кабыл алынган ченемдик укуктук актыларды да тааныштырды. Анын ичинде 7-августта №525 токтом менен бекитилген катуу тиричилик калдыктарын жайгаштыруу полигондору боюнча техникалык ченемге көңүл бурулду.
Министрлик башаламан таштанды төгүлүүчү жайларды кыскартууга мамлекеттик колдоо көрсөтүлүп, тиешелүү чаралар көрүлөрүн билдирди.
