Министрлик Орусиядагы кыргызстандыктардын 30 баласын эс алууга жөнөттү
Эмгек, социалдык камсыздоо жана миграция министрлиги Орусияда жашаган кыргызстандыктардын 30 баласын Чолпон-Ата шаарындагы "Меридиан" ден соолукту чыңдоо лагерине жайкы эс алууга жөнөттү. Бул тууралуу министрликтин басма сөз кызматы маалымдады.
Демилгенин негизги максаты — чет өлкөдө жашаган кыргызстандыктардын балдарынын Кыргызстан менен байланышын бекемдөө, улуттук өзгөчөлүгүн сактоого көмөктөшүү жана аларды кыргыз элинин маданияты, каада-салты жана тарыхы менен жакындан тааныштыруу.
Белгиленгендей, балдар спорттук, маданий жана таанып-билүү иш-чараларына катышышат. Ошондой эле Дүйнөлүк көчмөндөр оюндарынын алкагында кыргыз элинин мурасы менен тааныша алышат.
Мындан тышкары, теңтуштары менен баарлашуусуна шарт түзүлөт.
