Ноокаттагы 300 окуучуга ылайыкталган мектепте 830 бала билим алууда
Жогорку Кеңештин депутаты Советбек Рустамбек уулу Ноокат районундагы Жаңы-Ноокат, Бел, Кеңеш, Исанов, Мирмахмудов жана Гүлистан айыл аймактарын кыдырып, жергиликтүү тургундар менен жолугушту. Бул тууралуу парламенттин басма сөз кызматы билдирди.
Маалыматка ылайык, жолугушууларда негизинен мектеп жана бала бакчалардын жетишсиздиги, курулуш иштерин тездетүү, таза суу менен камсыздоо, сугат суу жана ички жолдорду оңдоо маселелери көтөрүлдү.
Талкууга тиешелүү министрликтердин, жергиликтүү бийликтин жана башка мамлекеттик органдардын өкүлдөрү катышты.
Исанов айыл аймагынын Жар-Коргон айылындагы Кожон Жолдошов атындагы мектеп 300 окуучуга ылайыкталып курулганына карабастан, учурда анда 830 окуучу билим алат. Ушуга байланыштуу кошумча имарат куруу зарылдыгы белгиленди.
Кеңеш айыл аймагында Дары-Суу жана Ак-Чабуу мектептеринин курулушун баштоо, ошондой эле Арбын жолунун 3 чакырым бөлүгүн оңдоо маселеси көтөрүлдү.
Жаңы-Ноокат айыл аймагында жергиликтүү бюджеттин эсебинен курулуп, учурда токтоп турган "Нур бөбөк" бала бакчасынын курулушун улантуу боюнча кайрылуу болду. Жетекчилер сметалык наркы кайра эсептелип жатканын жана жакынкы убакта курулуш иштери улантыларын билдиришти.
Бел айыл аймагында "Райхан" бала бакчасын ачуу, ички жолдорду оңдоо, сугат жана таза суу маселелери айтылды. Ал эми Гүлистан айыл өкмөтүндө Б. Шаназаров жана Г. Гулям атындагы мектептерге байланыштуу көйгөйлөр каралды.
Мирмахмудов айыл аймагында Абдул-Кадирий атындагы орто мектептин тиешелүү документтери даярдалып, курулуш иштерин баштоого даярдык көрүлүп жатканы маалымдалды. Ошондой эле Үч-Кемпир айылындагы Пазылов атындагы мектептин документ иштерин бүткөрүү жана Арал айылына бала бакча куруу боюнча сунуштар айтылды.
Эл өкүлү Советбек Рустамбек уулу көтөрүлгөн маселелер боюнча тиешелүү мамлекеттик органдар менен иш алып барып, алардын чечилишине багытталган демилгелерди көтөрөрүн билдирди.
