Өлкө боюнча 26–28-августта акысыз юридикалык жардам көрсөтүлөт
26–28-август күндөрү Кыргызстандын бардык аймактарында жарандарга акысыз укуктук жардам көрсөтүлөт. Бул тууралуу Юридикалык жардам кызматынан билдиришти.
Маалыматка ылайык, иш-чара Кыргызстандын Эгемендүүлүк күнүнө жана Юстиция министрлигинин 100 жылдыгына карата уюштурулууда.
Юридикалык жардам көрсөтүү үчүн Бишкекте жана өлкөнүн бардык облустарында атайын жайлар уюштурулат. Алардын арасында калкты тейлөө борборлору, айыл өкмөттөрү, мамлекеттик администрациялар, соода борборлору жана башка коомдук жайлар бар.
Бишкек шаарында акция Биринчи Май, Ленин, Свердлов жана Октябрь райондорунда өтөт.
Чүй облусунда Кара-Балта, Панфиловка, Сокулук, Кант, Токмок жана Кемин шаарларында жана райондорунда уюштурулат.
Мындан тышкары, акция Талас, Ош, Жалал-Абад, Баткен, Ысык-Көл жана Нарын облустарында да өткөрүлөт.
Жарандар белгиленген күндөрү өздөрүнө жакын жайгашкан жерге барып, адистерден укуктук маселелер боюнча акысыз кеңеш алып, кызыктырган суроолоруна жооп ала алышат.
