Ошто мал базарларда ветеринардык талаптар текшерилди
Ош облусундагы мал базарларда 17–24-август күндөрү ветеринардык көзөмөл жүргүзүлүп, жарандарга санитардык эрежелерди сактоо боюнча түшүндүрүү иштери жүргүзүлдү. Бул тууралуу Айыл чарба министрлигинин басма сөз кызматы билдирди.
Ветеринардык жана фитосанитардык көзөмөл кызматынын аймактык башкармалыгынын маалыматына ылайык, мониторингдин жүрүшүндө сатууга алып келинген малдардын ветеринардык коштомо документтери жана эн тамгалары текшерилди. Ошондой эле адистер жаныбарларды клиникалык кароодон өткөрүштү.
Бул аралыкта облус аймагындагы мал базарларга жалпысынан 1 788 баш ири мүйүздүү мал, 478 баш жылкы жана 3 087 баш кой-эчки алып келинген.
Кызматтын маалыматына ылайык, ветеринардык көзөмөл жана мониторинг өлкөнүн бардык аймактарында үзгүлтүксүз жүргүзүлүп, иштер эпизоотиялык абалды туруктуу көзөмөлдөө жана жаныбарлардын ден соолугун камсыз кылууга багытталган.
