Токмокто таштанды маселесине байланыштуу мэрияга чара көрүлдү
Токмокто таштандыга байланыштуу мыйзам бузуу фактылары аныкталып, жооптуу тараптарга административдик чаралар көрүлдү. Бул тууралуу Жаратылыш ресурстары, экология жана техникалык көзөмөл министрлигинин басма сөз кызматы билдирди.
Маалыматка ылайык, Чүй аймактык башкармалыгынын Экологиялык жана техникалык көзөмөл кызматы Чүй токой чарбасынын кызматкерлери менен биргеликте социалдык тармакта жарыяланган маалыматтын негизинде жеринде текшерүү жүргүздү.
Текшерүүнүн жүрүшүндө желеде сөз болгон аймактагы таштандылар тазаланды.
Аныкталган мыйзам бузуу фактысы боюнча Укук бузуулар жөнүндө кодекске ылайык, Токмок шаардык мэриясына 17 миң сом өлчөмүндө айып пул салынды.
Мындан тышкары, текшерүү иш-чараларынын алкагында калаада таштандыларды уруксатсыз жерде өрттөө фактысы аныкталды. Эреже бузган жеке тарапка 7 500 сом өлчөмүндө айып салынды.
Экологиялык жана техникалык көзөмөл кызматы айлана-чөйрөнү коргоо жана мыйзам талаптарынын сакталышын камсыз кылуу боюнча көзөмөл иштерин улантарын белгиледи.
