Жалал-Абадда ымыркайлардын ооруларынын алдын алуу боюнча жыйын өттү
Жалал-Абад облусунда энелердин жана ымыркайлардын ден соолугун коргоо, тубаса оорулардын алдын алуу жана аларды эрте аныктоо маселелери талкууланган жыйын өттү. Бул тууралуу аймактык өкүлчүлүктүн басма сөз кызматы билдирди.
Жыйынга облус башчысы Тилек Текебаев, облус башчысынын орун басарлары жана Саламаттык сактоо министрлигинин аймактагы координатору Өмүрбек Махамаджунус уулу, медицина тармагы боюнча адис Бакай Календеров катышты.
Иш-чарада энелердин жана ымыркайлардын өлүмүнүн алдын алуу, кош бойлуу аялдардын ден соолугун көзөмөлдөө, тубаса жана генетикалык ооруларды эрте аныктоо маселелери каралды.
Медицина тармагы боюнча адис Бакай Календеров кош бойлуулук учурунда түйүлдүктүн абалын тыкыр көзөмөлдөөнүн маанилүүлүгүнө токтолуп, заманбап диагностикалык технологияларды кеңири колдонуу боюнча сунуштарын билдирди.
Анын ичинде түйүлдүктүн өсүп-өнүгүүсүн көзөмөлдөө, жүрөк жана башка тубаса өзгөрүүлөрдү эрте аныктоо үчүн заманбап лабораториялык изилдөө ыкмаларын колдонуу маселелери талкууланды.
Ошондой эле Жалал-Абад облусун бул багытта пилоттук аймак катары сунуштоо демилгеси көтөрүлдү. Бул үчүн медициналык мекемелерди зарыл жабдуулар менен камсыздоо, адистердин кесипкөйлүгүн жогорулатуу жана каржылоо булактарын тартуу маселелери каралды.
Облус башчысы эне менен баланын ден соолугуна өзгөчө көңүл буруу зарылдыгын белгилеп, ооруларды эрте аныктоо жана өз убагында медициналык жардам көрсөтүү боюнча иштерди системалуу уюштуруу керектигин белгиледи.
