Жазы дарыясында мыйзамсыз балык уулаган жаранга доо коюлду
Жазы дарыясында мыйзамсыз балык уулоого каршы өткөрүлгөн кезектеги рейдде балык уулоо эрежелерин бузган үч жаран аныкталды. Алардын биринде мыйзамсыз кармалган 16 кара балык болгон.
Жаратылыш ресурстары, экология жана техникалык көзөмөл министрлигинин басма сөз кызматы маалымдагандай, жаратылышка келген зыяндын ордун толтуруу үчүн жаранга 8 080 сом өлчөмүндө доо коюлду.
Эсептөөгө ылайык, ар бир мыйзамсыз кармалган кара балыкка зыян 505 сомдон эсептелди. Калган эки жаранга балык уулоо эрежелерин сактоо боюнча түшүндүрүү иштери жүргүзүлдү.
Министрлик жарандарды жаратылыш байлыктарына аяр мамиле кылууга, биологиялык ресурстарды коргоого жана балык уулоонун белгиленген эрежелерин так сактоого чакырды.
