Акыйкатчынын орун басары Жалал-Абадда камактагылар менен жеке маектешти

Акыйкатчынын орун басары Медербек Усаров Жалал-Абад облусунун Базар-Коргон районундагы Жаза аткаруу мамлекеттик кызматынын №10 түзөтүү колониясына жана Манас шаарындагы №53 тергөө абагына мониторинг жүргүздү.

Акыйкатчы институтунун басма сөз кызматы билдиргендей, Медербек Усаров соттолгондор жана камактагылар менен жекеме-жеке сүйлөшүп, алардын кайрылууларын укту.

Маалыматка ылайык, айтылган маселелердин айрымдары боюнча укуктук кеңеш берилип, бир катар арыздарды мекеме администрациясы жеринде карап, чечип берди.

Мындан тышкары, кыйноолорго, ырайымсыз, адамгерчиликсиз же кадыр-баркты басмырлаган мамилеге жол бербөө боюнча түшүндүрүү иштери жүргүзүлдү.

Базар-Коргон районундагы №10 түзөтүү колониясы 2024-жылы пайдаланууга берилген. Мекемеде кийим-кече жана бут кийим тигүүчү, зым жана кыш чыгаруучу цехтер иштейт.

Мониторинг учурунда мекеменин стационарында 9 соттолгон жаран дарыланып жаткан. Ошондой эле катуу тартиптеги корпуста кармалып турган 186 соттолуучунун шарттары текшерилип, алар менен маектешти.

Ал эми Манас шаарындагы №53 тергөө абагында мониторинг учурунда 216 адам кармалып турган. Алардын 206сы эркек, 10у аял. Арасында 8 жашы жете элек өспүрүм жана 10 чет элдик жаран бар.

Мониторингдин жыйынтыгында эки мекемеде тең жарандардын Акыйкатчы институтуна жашыруун кайрылуусу үчүн атайын кутучалар орнотулду.