Борбор калаада жаштарды 2D/3D долбоорлоого акысыз окутуу макулдашылды
Бишкек шаардык иш менен камсыз кылууга көмөктөшүү башкармалыгынын башчысы Талантбек Жекшенов Сеул эл аралык достук ассоциациясынын президенти Су Жу Ли жана "FabLab Bishkek" борборунун директору Джу Серена менен жолугушту.
Аталган башкармалыктан билдиришкендей, жолугушууда тараптар кызматташуунун келечегин талкуулап, Бишкек шаарында иш издеп каттоодо турган жаштар үчүн санариптик технологиялар боюнча акысыз окууларды уюштуруу тууралуу макулдашышты.
Долбоордун алкагында катышуучулар CorelDRAW жана SolidWorks программалары аркылуу 2D/3D санариптик долбоорлоону, ошондой эле Arduino программалоосунун негиздерин үйрөнүшөт.
Маалыматка ылайык, бул демилге жаштардын эмгек рыногунда талап кылынган заманбап көндүмдөрдү өздөштүрүүсүнө жана атаандаштыкка жөндөмдүүлүгүн арттырууга багытталган.
