Дарыгерлер үчүн 50 орунга ылайыкталган эс алуу жайы салына баштады
Ысык-Көлдө дарыгерлерге ден соолугун чыңдоосу үчүн жаңы эс алуу корпусу курула башталды. Бул тууралуу Кесиптик бирликтер федерациясынан билдиришти.
Маалыматка ылайык, мезгил кутучасын салуу аземине Саламаттык сактоо министринин орун басары Гулбара Ишенапысова, Кесиптик бирликтер федерациясынын төрагасы Мурадил Жумадилде уулу жана Саламаттык сактоо кызматкерлеринин кесиптик бирлигинин төрагасы Каарманбек Байдавлетов катышты.
Жаңы корпус эски имараттын ордуна курулуп, 40–50 орунга ылайыкталат. Анда медицина кызматкерлеринин эс алуусу үчүн заманбап шарттар түзүлөт.
Белгилей кетсек, бул Кыргызстан эгемендүүлүк алгандан бери саламаттык сактоо кызматкерлеринин кесиптик бирлиги тарабынан мүчөлүк төгүмдөрдүн эсебинен өз күчү менен курулуп жаткан алгачкы жаңы эс алуу жайы болуп саналат.
Иш-чарада Мурадил Жумадилде уулу долбоор профсоюз мүчөлөрүнүн каражатын кызматкерлердин ден соолугун чыңдоосуна жана социалдык шарттарын жакшыртууга багыттоонун маанилүү мисалы экенин белгиледи.
Федерация төрагасы дарыгерлердин эмгеги өзгөчө жоопкерчиликти талап кыларын айтып, алардын сапаттуу эс алуусу жана ден соолугун калыбына келтирүүсү дайыма көңүл борборунда болушу керектигин белгиледи.
