Геология кызматы электрондук аукциондун сынамык долбоорун ишке киргизди
Кыргыз геология кызматы жер казынасын пайдаланууга укук берүү боюнча электрондук аукцион өткөрүүнүн пилоттук долбоорун ишке киргизди. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Долбоордун негизги максаты – жер казынасын пайдаланууга укук берүү иштеринин ачык-айкындуулугун, атаандаштыкка жөндөмдүүлүгүн жана жеткиликтүүлүгүн жогорулатуу. Ошондой эле заманбап санариптик технологияларды колдонуу аркылуу административдик жол-жоболорду жөнөкөйлөтүү көздөлүүдө.
Электрондук аукцион форматында катышуучулар арыз берүү, керектүү документтерди тапшыруу жана аукционго катышуу иштерин бирдиктүү электрондук тутум аркылуу жүргүзө алышат.
Кыргыз геология кызматы белгилегендей, электрондук аукциондорду киргизүү жер казынасын пайдалануу тармагын санариптештирүүгө, инвестицияларды тартууга жана мамлекеттик башкаруунун ачык-айкындуулугун камсыз кылууга багытталган иштердин бир бөлүгү болуп саналат.
Электрондук аукционго катышууну каалаган жеке жана юридикалык жактар аукциондун шарттары, объекттер тууралуу маалымат жана катышуу тартиби менен электрондук аукциондун порталынан тааныша алышат.
