Баткендин мэри аймактагы курулуш иштеринин жүрүшүн көзөмөлгө алды

Баткендин мэри Сейтек Кулубаев шаар аймагындагы бир катар курулуш жана инфратүзүмдүк иштердин жүрүшүн көзөмөлгө алды. Бул тууралуу калаа мэриясынын басма сөз кызматы билдирди.

Маалыматка ылайык, шаар башчысы Тамаша-Жай конушундагы таза суу менен камсыздоо, Чет-Булак аймагындагы көпүрөнүн курулушу, Мамлекеттик ипотекалык компания куруп жаткан суу кампасы жана базардын айланасын иретке келтирүү иштерин көрүп чыкты.

Тамаша-Жай конушунда учурда суу түтүктөрүн туташтырылып, айрым тилкелер казылып жатат. Жумуштарды сентябрда аяктап, тургундарды таза суу менен камсыз кылуу көздөлүүдө.

Чет-Булак аймагындагы көпүрөнүн курулушу боюнча тиешелүү кызматтарга тапшырмалар берилди.

Жетекчилик бардык курулуш иштеринин сапатына жана мөөнөтүнө көзөмөлдү улантарын билдирди.