Кантта унаа башкаруу укугунан ажыратылган айдоочу рулда кармалды
Кант шаарында алдын алуу иш-чарасы учурунда унаа башкаруу укугунан ажыратылган айдоочу рулда аныкталды. Бул тууралуу Жол кыймылынын коопсуздугун камсыздоо башкы башкармалыгынын басма сөз кызматы билдирди.
Маалыматка ылайык, текшерүүдө Toyota Land Cruiser үлгүсүндөгү унаанын айдоочусунун документтерин текшеришкен. Жаран айдоочулук күбөлүгүн үйүндө калтырганын айткан.
Кызматкерлер заманбап планшет аркылуу маалыматтарды текшеришип, айдоочунун буга чейин унаа башкаруу укугунан ажыратылганы аныкталган.
Жаранга мыйзамда белгиленген тартипте тиешелүү чаралар көрүлүп, унаа айып короого киргизилди. Ошондой эле ага жол кыймылынын эрежелерин сактоо боюнча түшүндүрүү иштери жүргүзүлдү.
ЖКККББ айдоочуларды унаа башкаруу укугу жок учурда рулга отурбоого жана жол кыймылынын эрежелерин так сактоого чакырды.
