Караколдо кафелерде жашы жете электердин укуктары бузулуп, ашыкча иштеп келишкен
Караколдо коомдук тамактануучу жайларда иштеген 15–17 жаштагы өспүрүмдөрдүн эмгек укуктары бузулган фактылар аныкталды. Бул тууралуу Акыйкатчы институтунун Ысык-Көл облусундагы өкүлчүлүгү билдирди.
Маалыматка ылайык, адистер кафе-ресторандарда иштеген жашы жете электердин эмгек шарттарына мониторинг жүргүзүп, эмгек келишимдерин текшерип, өспүрүмдөр арасында жашыруун сурамжылоо өткөрүшкөн.
Өспүрүмдөр тейлөөчү жана музыкант болуп иштешкен. Текшерүүдө айрымдары менен эмгек келишими түзүлбөгөнү, ошондой эле ата-энесинин же мыйзамдуу өкүлүнүн жазуу жүзүндөгү макулдугу алынбаганы аныкталган.
Мындан тышкары, иш берүүчүлөр айрым өспүрүмдөрдүн идиш сындырып алганы, жумушка кечиккени жана башка тартип бузуулары үчүн айып пул салып, акчаны эмгек акысынан кармап келишкен.
Ошондой эле өспүрүмдөрдүн жумуш убактысы мыйзамда белгиленген чектен ашканы аныкталган. Алар саат 10:00дөн 22:00гө чейин иштеп келишкен.
Эмгек кодексине ылайык, 14–16 жаштагы өспүрүмдөр күнүнө 5 сааттан, ал эми 16–18 жаштагылар 7 сааттан ашык иштей албайт. 14 жаштан баштап иштөөгө ата-энесинин же мыйзамдуу өкүлүнүн жазуу жүзүндөгү макулдугу менен гана уруксат берилет.
Адистер өспүрүмдөргө алардын эмгек укуктарын түшүндүрүп, иш берүүчүлөргө мыйзам талаптарын сактоо зарылдыгын эскертишти.
Акыйкатчы Институту мамлекеттик органдарды жашы жете электердин эмгек укуктарынын бузулушуна жол бербөө жана мындай фактылардын алдын алуу иштерин күчөтүүгө чакырды.
