Кызыл-Кыяда эки медициналык жана бир өндүрүштүк объект ачылат
Эгемендүүлүктүн 35 жылдыгына карата Кызыл-Кыя шаарында үч жаңы социалдык жана өндүрүштүк жай ишке берилет. Бул тууралуу калаа мэриясынын басма сөз кызматы билдирди.
Маалыматка ылайык, алар — Токтогул көчөсүндөгү Үй-бүлөлүк дарыгерлер тобу, Караван айылындагы терапия бөлүмү жана "Асыл Холдинг" өнөр жай объектиси.
Мындан тышкары, калаада күз-кыш мезгилине даярдык иштери да талкууланып, электр жабдууларын, өткөргүчтөрдү жана туташтыруу тутумдарын талапка ылайык келтирүүгө жана өрт коопсуздугун күчөтүүгө көңүл бурулду.
Билим берүү, коммуналдык жана энергетикалык мекемелердеги аныкталган кемчиликтерди белгиленген мөөнөттө жоюу боюнча тиешелүү тапшырмалар берилди.
Ошондой эле камсыздандыруу тармагындагы иштерди күчөтүү боюнча президенттин жарлыгын аткаруу милдети коюлду.
