Ысык-Көлдөн жыл башынан бери 840 кг таштанды чыгарылды
2026-жылдын башынан бери Ысык-Көлдүн акваториясында жалпысынан 55 рейддик иш-чара өтүп, анын жүрүшүндө 36 500 метр мыйзамсыз балык уулоочу тор (365 даана) жана 840 килограммга жакын таштанды чыгарылды.
Жаратылыш ресурстары, экология жана техникалык көзөмөл министрлигинин басма сөз кызматы билдиргендей, рейддин негизги максаты — Ысык-Көлдүн экологиялык абалын жакшыртуу, суу биоресурстарын коргоо жана мыйзамсыз балык уулоонун алдын алуу.
Ал эми 25–26-августта өткөн кезектеги рейдде көлгө мыйзамсыз коюлган синтетикалык балык уулоочу торлор жана ар кандай таштандылар аныкталып, акваториядан чыгарылды.
Эки күнгө созулган рейддин жыйынтыгында көлдөн жалпы узундугу 5300 метрге жакын синтетикалык балык уулоочу тор жана 100 килограммга жакын таштанды чыгарылган.
Министрлик Ысык-Көлдүн экологиялык коопсуздугун камсыз кылуу, суу биоресурстарын коргоо жана браконьерликке каршы күрөшүү боюнча рейддик жана көзөмөлдөө иштери мындан ары да үзгүлтүксүз улантыларын билдирди.
