Жыргалаңдагы лыжа трассалары эл аралык стандарттарга ылайыкташтырылат
"Ала-Тоо Резорт" ААКтын адистери, эл аралык консультанттар, подряддык уюмдардын өкүлдөрү жана долбоордун авторлору Жыргалаңдагы курулуш жүрүп жаткан тилкелерди карап чыгышты. Бул тууралуу "Ала-Тоо Резорт" ААКтан билдиришти.
Анын алкагында лыжачылар менен сноубордчулардын коопсуздугун камсыз кылуу маселелери талкууланды. Атап айтканда, кооптуу тилкелерге коргоочу торлорду орнотуу, трассаларды тосуу жана лыжа тебүү учурундагы тобокелдиктерди азайтуу боюнча чаралар каралды.
Өзгөчө көңүл Эл аралык лыжа жана сноуборд федерациясынын (FIS) талаптарына ылайык даярдала турган трассаларга бурулду. Алар бийиктиктин айырмасы, туурасы, эңкейиш деңгээли, конфигурациясы, старт жана финиш зоналарын уюштуруу боюнча эл аралык талаптарга жооп бериши керек.
Мындан тышкары, трассаларды даярдоодо спортчулардын коопсуздугу жана мелдештерди өткөрүү үчүн зарыл болгон шарттар эске алынат.
