Ак-Бууранын боюнда 15 гектарлык заманбап эс алуу багы ачылды
Ош шаарындагы Курманжан-Датка муниципалдык аймактык башкармалыгында аянты 15 гектар болгон жаңы эс алуу багы ачылды. Ал жер гүлдөр жана жашыл бактар менен көрктөндүрүлүп, түнкү жарыктандыруулар орнотулгон.
Калаа мэриясынын басма сөз кызматы билдиргендей, ачылыш аземине Жогорку Кеңештин төрагасы Марлен Маматалиев, депутаттар жана Ош шаарынын мэри Жанарбек Акаев катышты.
Марлен Маматалиев шаар инфраструктурасы калктын муктаждыгына ылайык өнүгүп, коомдук жайлар көбөйүшү керек экенин белгиледи.
Жанарбек Акаевдин айтымында, Президенттин колдоосу менен Ош шаарына 10 миллиард сомдон ашык каражат бөлүнүп, ал Ак-Буура дарыясынын жээктерин иретке келтирүүгө, инфратүзүмдү жаңылоого, жашылдандырууга жана шаарды көрктөндүрүүгө жумшалууда.
Жаңы сейил бак шаар тургундары жана коноктору үчүн коопсуз, жайлуу жана үй-бүлөлүк эс алууга ылайыктуу коомдук мейкиндик болуп кызмат кылат.
