Таласта 57 млн сомго 150 орундуу жаңы окуу имараты курулду
Талас районунун Ак-Жар айылындагы А. Султанбеков атындагы мектепке 150 орундуу жаңы окуу имараты курулду. Бул тууралуу Курулуш министрлигинин басма сөз кызматы билдирди.
Маалыматка ылайык, иштер республикалык казынадан каржыланып, объекттин жалпы наркы 57 млн сомду түздү. Мекеме жаңы окуу жылында пайдаланууга берилет.
Эки кабаттуу имараттын жалпы аянты 1282 чарчы метр. Анда заманбап окуу класстары, химия жана биология лабораториялары, китепкана, ашкана, эмгек бөлмөлөрү жана жыйындар залы жайгашкан.
Белгиленгендей, жаңы окуу жайынын ачылышы мектептеги окуучулар жана айылдын тургундары үчүн шарттарды жакшыртат.
