Гепатология борборунун пайдубалына мезгил кутусу салынды
Бишкектеги Республикалык клиникалык жугуштуу оорулар ооруканасынын аймагында курула турган адистештирилген Гепатология борборунун пайдубалына мезгил кутусун салуу аземи өттү. Бул тууралуу парламенттин басма сөз кызматы билдирди.
Аземге Жогорку Кеңештин төрагасы Марлен Маматалиев, министрлер, Бишкек шаарынын мэри жана башка жетекчилер катышты.
Марлен Маматалиев жаңы борбор боор ооруларын эрте аныктоого, заманбап деңгээлде дарылоого шарт түзөрүн айтып, медицина тармагын өнүктүрүү мамлекеттин артыкчылыктуу багыттарынын бири экенин белгиледи.
Долбоор боюнча борбор төрт кабаттуу болуп, жалпы аянты 3 100 чарчы метрди түзөт жана 80 орунга ылайыкталат. Ал заманбап медициналык жабдуулар менен толук камсыздалат.
Жаңы борбордо бейтаптарды алгачкы медициналык кароодон өткөрүү, тереңдетилген диагностика жүргүзүү, стационардык жана амбулатордук дарылоо, диспансердик көзөмөл жана андан кийинки медициналык коштоо үчүн бирдиктүү шарттар түзүлөт.
