Манас шаарында 20 млн 303 миң сомдук долбоор: 12 отказан орнотулууда
Манас шаарында "Жылуулук" муниципалдык ишканасы жылуулук тутумун жаңылоо иштеринин алкагында 12 даана жаңы үлгүдөгү отказанды орнотуп жатат. Бул тууралуу калаа мэриясынын басма сөз кызматы билдирди.
Маалыматка ылайык, отказандардын 11и Жалал-Абад облустук өнүктүрүү фондунун каржылоосу менен, ал эми 1 отказан жергиликтүү казынанын эсебинен алынган. Долбоордун жалпы баасы 20 миллион 303 миң сомду түзөт.
Жаңы отказандар газ жана мазут менен иштөөгө ылайыкталган. Мындан сырткары, жабдуулар электр жарыгы өчүп, кайра берилген учурда ишин автоматтык түрдө улантуу мүмкүнчүлүгүнө ээ.
Белгиленгендей, бул долбоор кыш мезгилинде шаар тургундарын туруктуу жана сапаттуу жылуулук менен камсыздоону жакшыртууга багытталган.
