Ош шаарынын күнүнө карата 12 гүлзар пайдаланууга берилет
Ош шаарында 5-октябрь — шаар күнүнө карата 12 жаңы гүлзар пайдаланууга берилет. Учурда алардын курулуш жана көрктөндүрүү иштери жүрүп жатат.
Калаа жетекчилигинин маалыматына ылайык, буга чейин кароосуз калган жана негизинен эски көп кабаттуу үйлөрдүн айланасында жайгашкан аймактар жаңыланууда.
Жаңы гүлбактарда балдар үчүн аянтчалар, отургучтар, жарыктандыруу жана жашылдандыруу каралып, шаар тургундары үчүн ыңгайлуу жана коопсуз эс алуу жайларын түзүүгө багытталган.
Курулуш иштеринин жүрүшү менен Ош шаарынын мэриясынын жетекчилиги жеринен таанышып, объектилерди белгиленген мөөнөттө бүтүрүү тапшырмаларын берди.
