Кырчында ыкчам жардам көрсөтүү үчүн эки тик учак нөөмөттө турат
VI Дүйнөлүк көчмөндөр оюндары өтүп жаткан Кырчын жайлоосунда жарандарга зарыл учурда ыкчам жардам көрсөтүү үчүн Өзгөчө кырдаалдар министрлигинин эки тик учагы нөөмөткө коюлду. Бул тууралуу ӨКМдин басма сөз кызматы билдирди.
Маалыматка ылайык, Airbus H-125 жана Airbus H-145 үлгүсүндөгү тик учактар зарыл болгон учурда бейтаптарды ооруканага ыкчам жеткирүү үчүн пайдаланылат.
Мындан тышкары, Ысык-Көл районунун бир катар аймактарында жана Кырчын жайлоосунда өрт өчүрүүчү жана авариялык-куткаруу унаалары нөөмөттө турат. Куткаруучулар күнү-түнү коопсуздукту камсыздап, өзгөчө кырдаалдардын алдын алуу жана зарыл учурда ыкчам чара көрүү үчүн иш алып барууда.
Ошондой эле Кырчын жайлоосунда ӨКМдин мобилдүү госпиталы иштеп, дарыгерлер кайрылган жарандарга медициналык жардам көрсөтүүдө.
