Баткендин тоолуу аймагынан Северцов аркары кездешти

Баткен облусунун тоолуу аймагынан Северцов аркары кездешти. Бул тууралуу Жаратылыш ресурстары, экология жана техникалык көзөмөл министрлиги билдирди.

Маалыматка ылайык, жаныбар министрликтин Баткен регионалдык башкармалыгынын аңчы-егерлери жүргүзгөн рейд учурунда байкалган.

Адистер аркардын абалына байкоо жүргүзүп, анын табигый чөйрөдө жүргөнүн белгилешти.

Министрликтин маалыматына караганда, жапайы жаныбарлардын адамдарга жакын аймактарда кездешүүсүнө жашоо чөйрөсүндөгү өзгөрүүлөр, азык издөө же багытынан адашып калуу сыяктуу жагдайлар себеп болушу мүмкүн.

Северцов аркары Кыргызстандын тоолуу аймактарында кездешкен жапайы жаныбарлардын бири. Аркарлар тоо экосистемасынын маанилүү бөлүгү болуп саналат жана алардын жашоо чөйрөсүн сактоо биологиялык ар түрдүүлүктү коргоодо өзгөчө мааниге ээ.

Министрлик жарандарды жапайы жаныбарларга жолуккан учурда аларга жакындабоого, үркүтпөөгө жана зыян келтирбөөгө чакырды.