Дүйнөлүк көчмөндөр оюндарында коопсуздук чаралары күчөтүлөт
Кечээ Чолпон-Ата шаарында Коопсуздук кеңештин катчысы Адилет Орозбековдун төрагалыгы алдында VI Дүйнөлүк көчмөндөр оюндарын өткөрүүдө коопсуздукту камсыздоо маселелери боюнча жумушчу жыйын өттү.
Президенттик администрациянын маалыматына ылайык, жыйын Президент Садыр Жапаровдун тескемеси менен түзүлгөн Координациялык штабдын иш-чараларынын алкагында өткөрүлдү.
Анда ички иштер, улуттук коопсуздук, өзгөчө кырдаалдар, саламаттык сактоо жана башка мамлекеттик органдардын, ошондой эле жергиликтүү өз алдынча башкаруу органдарынын жетекчилери оюндар учурунда коопсуздукту камсыздоо боюнча көрүлүп жаткан чаралар тууралуу маалымат беришти.
Адилет Орозбеков Кыргызстанда буга чейин өткөрүлгөн ири эл аралык иш-чаралар тынч жана коопсуз шартта өткөнүн белгиледи. Анын айтымында, Координациялык штабдын координациялоосу менен укук коргоо органдары, атайын жана күч түзүмдөрү тарабынан тиешелүү коопсуздук чаралары көрүлгөн.
Коопсуздук кеңешинин катчысы мындай иштер VI Дүйнөлүк көчмөндөр оюндары өтүп жаткан бүткүл мезгил аралыгында үзгүлтүксүз жүргүзүлүшү керектигин белгиледи.
Жыйындын жыйынтыгында тиешелүү мамлекеттик органдарга жана жергиликтүү өз алдынча башкаруу органдарына коопсуздукту камсыздоо боюнча бир катар тапшырмалар берилди.
