Кыргызстан менен JICA жашылча-жемиш кластерлерин өнүктүрөт
Суу ресурстары, айыл чарба жана кайра иштетүү өнөр жайы министрлигинде министрдин орун басары Рысгүл Акимжанова Япониянын Эл аралык кызматташтык агенттигинин (JICA) өкүлдөрү менен сүйлөшүүлөрдүн жыйынтыгы боюнча протоколго кол койду.
Ведомствонун маалыматына ылайык, документ 2027-жылы ишке ашырылышы пландалып жаткан жашылча жана мөмө-жемиш кластерлерин өнүктүрүү боюнча биргелешкен долбоорго даярдык көрүүнүн алкагында кабыл алынды.
Долбоор ата мекендик жашылча-жемиш продукциясынын атаандаштыкка жөндөмдүүлүгүн жогорулатууга багытталган. Ошондой эле өндүрүштөн тартып кайра иштетүү, сактоо жана сатууга чейинки бардык этаптарда кошумча нарк түзүүгө басым жасалат.
Тараптар кластердик ыкманы киргизүү, заманбап технологияларды колдонуу жана органикалык айыл чарбасын өнүктүрүү маселелерин талкуулашты.
Мындан тышкары, органикалык айыл чарба багытындагы лабораториялык базаны чыңдоо жана адистердин квалификациясын жогорулатуу маселелерине көңүл бурулду.
