Кыргызстанда курулуш тармагында чет өлкөлүк технологиялар сыналууда
Кыргызстанда курулуш тармагындагы инженердик-геологиялык изилдөөлөрдүн жергиликтүү жана чет өлкөлүк ыкмалары салыштырылууда. Бул тууралуу Курулуш, архитектура жана турак жай-коммуналдык чарба министрлиги билдирди.
Маалыматка ылайык, Инженердик изилдөөлөр департаменти Кыргызстанда жана чет өлкөлөрдө колдонулган инженердик-геологиялык изилдөө ыкмаларына салыштырмалуу талдоо жүргүзүүдө.
Анын алкагында Бишкектин Шевченко көчөсүндө курулуп жаткан 9-14 кабаттуу турак үйдүн аймагында эки башка ыкма менен бургулоо иштери жүргүзүлдү.
Биринчи компания изилдөөлөрдү Кыргызстанда колдонулуп жаткан ченемдик-техникалык талаптарга ылайык жүргүзсө, экинчиси Кытайда кабыл алынган стандарттарга негизделген технологияны колдонду. Министрликтин маалыматына караганда, ушундай эле ыкмалар Европа өлкөлөрүндө жана АКШда да колдонулат.
Бургулоо иштери 29 метр тереңдикке чейин жүргүзүлдү. Учурда адистер эки ыкманы иштин ылдамдыгы жана технологиясы, үлгүлөрдү алуу сапаты, колдонулган жабдуулар жана алынган жыйынтыктар боюнча салыштырууда.
Сыноолордун жыйынтыгы ар кандай ыкмалардын натыйжалуулугун баалоого жана аларды Кыргызстанда мындан ары колдонуу мүмкүнчүлүгүн аныктоого шарт түзөт.
