Кыргызстанда шахматты өнүктүрүүгө 100 млн сом бөлүнөт
Кыргызстанда Кыргыз Шахмат Союзуна караштуу Улуттук шахмат академиясы түзүлөт. Тиешелүү Жарлыкка Президент Садыр Жапаров кол койду.
Президенттик администрациянын маалыматына ылайык, академияны түзүүнүн максаты – эл аралык класстагы шахматчыларды даярдоо системасын өркүндөтүү, жаштардын интеллектуалдык потенциалын өнүктүрүү үчүн заманбап база түзүү жана таланттуу спортчуларды системалуу колдоо.
Жарлыкка ылайык, жогорку спорттук натыйжаларды көрсөткөн шахматчыларга жана машыктыруучуларга мамлекеттик колдоо көрсөтүлөт. Каражат эл аралык мелдештерге жана окуу-машыгуу жыйындарына катышууга, керектүү инвентарларды сатып алууга жана кесиптик өнүгүүгө байланышкан башка чыгымдарга багытталат.
Белгилей кетсек, буга чейин Президенттин 2026-жылдын 3-июнундагы Жарлыгы менен шахматты өнүктүрүү жана популярдаштыруу мамлекеттик социалдык саясаттын артыкчылыктуу багыттарынын бири катары аныкталган.
Ошондой эле Кыргыз Шахмат Союзуна караштуу шахматты өнүктүрүү фондун түзүү каралган. Анын алкагында заманбап материалдык-техникалык база түзүүгө, шахматты өнүктүрүүгө жана жайылтууга көмөктөшүү үчүн Президенттин фондунан 100 млн сом бөлүнөт.
